diverse | Villrein

Taksering av lavbeite – viktig del av kvalitetsnorma

Frå lavbeitetaksering i Stigstuvdalen på Hardangervidda, Erik Skjoldal. Foto: Siri Wølneberg Bøthun

Som ein del av arbeidet med ei kvalitetsnorm for villrein, delnorm 2, er det i gang lavbeitetaksering i fleire område. Dette arbeidet har gått føre seg sidan 2016 og i sommar har Siri Wølneberg Bøthun frå Sogn Naturforvaltning på oppdrag av NINA blant anna drive beitetaksering av lavbeite på Hardangervidda, altså vinterbeite for villreinen. Men kartlegging av reinbeite på Hardangervidda har òg ei eldre historie.

Siri Wølneberg Bøthun

Siri Wølneberg Bøthun har undersøkt lavbeite på Hardangervidda denne sommaren – eit typisk vinterbeite som ligg rundt Kalhovd og ved Sønstevatn på Aust-Vidda. Eit anna område er òg undersøkt, det ligg ved Skardbuåsen noko lenger vest. Og Bøthun, som er erfaren på dette området, har denne gongen hatt med seg to «lærlingar» frå Norsk Villreinsenter sør: fagkonsulent Lena Romtveit og naturrettleiar Tuva Flor Lien. Bøthun har òg hatt med seg Erik Skjoldal i ei prosjektstilling i sommar, han var òg med i fjor då dei arbeidde i Nordfjella, Vest-Jotunheimen og Fjellheimen, i dei to sistnemnde områda var òg Geir Rune Rauset frå NINA med.

Metoden ein nyttar har røter langt tilbake. I eit kapittel i boka «Reindriften og dens grunnlag» (Skjenneberg og Slagsvold 1968), under «praktisk beitegransking», snakkar ein om ei såkalla linjetaksering, der ein legg takseringsliner fleire stadar i terrenget, slik at ein skal passere mest mogleg representative område. Bøthun brukar omgrepet transekt som rett og slett tyder linje eller profil av vegetasjon ein ønskjer å undersøkje. Ved hjelp av analyse innanfor ruter på 50 x 50 cm som blir plassert slik at det ligg ei samling av fem ruter med om lag 500 meter mellom kvar lokalitet, skal ein måle tilstanden til lavet, tjukkleik, dekningsgrad osv. Området er identisk med eit område ein undersøkte i 2016, altså handlar det om å undersøkje endringar i løpet av fem år. Arbeidet er avslutta såpass nyleg at det enno tek litt tid før resultata av desse takseringane er klart.

“Lærlingane” Tuva Flor Lien og Lena Romtveit frå Norsk Villreinsenter på lavbeitetaksering. Foto: Siri Wølneberg Bøthun

Overvåkingsprogrammet for hjortevilt og kvalitetsnorma

Arbeidet med lavtaksering høyrer til innafor Overvåkingsprogrammet for hjortevilt, der reinsdyrforskar Olav Strand frå NINA representerer villreinen. Eit transekt blei lagt ut i regi av NINA i 2016 på Hardangervidda med tanke på overvåking av lavbeita, i 2017 og 2018 blei det same gjort i Nordfjella med tanke på den spesielle situasjonen der. Data frå overvåkingsprogrammet blir òg gjort tilgjengelege for utviklinga av metodar innafor satelittovervåkinga av lavbeite innafor kvalitetsnorma for villrein. Delnorm 2 i kvalitetsnorma handlar om tilstanden i lavbeita, det ein kallar lavbiomasse, altså vinterbeita. Her har NINA fått i oppdrag å utvikle ein ny metodikk som skal rekne ut lavmengde ved hjelp av satelittfoto der dei har teke i bruk kunstig intelligens i tolkinga av bileta, bakgrunnen er ei rivande teknisk utvikling innafor dette feltet.

Meir bakkedata må til

Ein konklusjon i samband med utviklinga av ny metodikk, noko som gjer ein i stand til å rekne ut lavbeite i heile villreinområdet, er at det må hentast inn meir bakkedata som skal nyttast i kombinasjon med datatolkinga av satelittbileta. Utfordringane er mange, blant anna det fenomen at lav ofte er dekt av anna vegetasjon. Forskarane vurderer ulike modellar og målet er at ein skal ha ein kvalitetssikra modell på plass innan hausten 2021 då dei 10 nasjonale villreinområda skal vurderast etter den nye kvalitetsnorma. Ein kan konkludere med at kvalitetsnorma slik er med på å gje arbeidet med ein ny lavmodell eit lyft som kan hjelpe forvaltninga med å betre vurdere tilstanden i lavbeita og med det fylgje utviklinga i framtida. (Viser her til ein artikkel i Villreinen 2021, forfattar Geir Rune Rauset m.fl.).

Litt historikk, Aksel Tveitnes – ein pioner

Tek me eit tilbakeblikk når det gjeld kartlegging av villreinens beite på Hardangervidda, har dette gått føre seg over lang tid. Ein pioner i så måte er Aksel Tveitnes, han var den fyrste som studerte samspelet mellom lavmattenes dekningsgrad og storleiken på villreinstamma over ein lengre tidsperiode. Sluttrapporten kom i 1980: «Lavgranskning på Hardangervidda 1951 – 1979, tilvekst og avbeiting i lavheisamfunnene, en granskning for praktisk-økonomiske forhold.» Utifrå undersøkingane han gjorde, kom han med eit overslag på ca 15 000 vinterdyr. På den tida prosjektet starta opp fanst det både tamrein og villrein på Vidda, og i fyrste perioden bruka han 60 analyseruter i villreinområda og 40 analyseruter i tamreinområda. For heile perioden 1951-1979 inspiserte han 495 ruter, men få av desse var på Austvidda. Det handla om vekst hjå lavartane gulskinn, reinlav og kvitkrull. Ved hjelp av sju ulike føresetnader, f.eks. det totale nyttbare arealet, vinterbeiteperioden osv., kom han altså fram til det omtrentlege talet 15 000 vinterdyr på Vidda, men ha tek atterhald om ein viss feilmargin. Det høyrer med til historia at villreinforskar Terje Skogland i si tid viste til rapporten til Tveitnes, då han publiserte NINA-rapporten «Villreinens bruk av Hardangervidda» frå 1993. (Desse opplysningane er henta frå Villreinen 2013, forfattar Dag K. Bjerketvedt).

Mange undersøkingar opp gjennom åra

Den same Bjerketvedt hadde saman med Arvid Odland og Jan Heggenes publisert ein artikkel i 2012 med tittelen «Hvor stort er vinterbeitearealet på Hardangervidda?». Her blir det referert til seinare målingar av areal, lavbiomasse og lavproduksjon, blant anna det internasjonale IBP-prosjektet som gjekk føre seg i åra 1968-1978. Og i 1979 kom ei anna analyse av samspelet mellom optimal reinsdyrproduksjon, tilgangen på lav og lavbiomasse. Bak denne analysen stod Eldar Gaare og Terje Skogland, modellen dei arbeidde utifrå bygde på data frå Hardangervidda og andre sørnorske område.

Somrane 1988 og 2004 var det Gaare, Tømmervik og Hoem som gjorde ei taksering av beita på Hardangervidda med vekt på vinterbeita. Etter dette kjem det blant anna ei vurdering av vinterbeita på Vidda i perioden etter 2004 ved hjelp av nye fjernmålingsteknikkar, resultata her er publisert i 2006 (Olav Strand m.fl.) Strand viser her bl.a. til at ein kan påvise betydelege endringar i lavbeita i ein del område frå 1951 og fram til våre dagar (2012). Nyare teknologi, bruk av satelittfoto og digitale kart, har ført diskusjonen inn på nye spor. Skal ein summere opp, viser dei ulike undersøkingane opp gjennom åra at resultata spriker såpass mykje at dette var krevjande for dei som forvalta villreinstamma. Og det blei stilt spørsmål ved om satelittbilete kunne gje eit anna resultat enn direkte feltanalysar. (Denne summariske gjennomgangen er henta frå ein artikkel i Villreinen 2012.)

villrein.no – Kjell Bitustøyl

Reinens pels på ettersommaren

diverse

Ung tamreinbukk fotografert siste veka i juli. Foto: Kjell Bitustøyl

Variasjon i pelsen til reinsdyra er eit kapittel for seg, og rundt månadsskiftet juli-august skjer det ei endring det er verdt å merke seg. Då blir restane av vinterpelsen hjå dei fleste reinsdyra heilt borte og dyra står fram mørkebrune og fine i pelsen.

Alle som har sett ein reinflokk i juli månad, har sett at det er stor variasjon i pelsen hjå dyra, dette skuldast langt på veg at dyra røyter litt forskjellig. Og mange vil hevde at dyra i denne perioden ikkje ser vidare fine ut. Det årlege pelsskiftet hjå reinen startar med røytinga av vinterpelsen i mai-juni og er avslutta i juli-august.

Villreinbukkar sist i juli månad, sommarpelsen kjem meir og meir fram, men framleis heng det att fragment av vinterpelsen. Foto: Kjell Bitustøyl

Røytingsperioden

Røytinga er ein indikator på reinens trivsel, og kraftige, velfødde dyr røyter tidlegare enn gamle og svake dyr. Så er der ein annan variasjon: Etter gode vintrar røyter reinen tidlegare enn i magre år. Vinterpelsen dett av i store flak og den nye sommarpelsen er tynnare og mørk og skil seg sterk frå den gamle hårveksten. Om det er varmt i vêret på fjellet, heites det at reinen kan bli seinare ferdig med røytinga. Er det kaldt i vêret, kan reinen gå ned i bjørkeskogen, og der vil han lettare kunne pusse av seg dei lause håra. Røytinga begynnar kring augo, vidare på halsen og ryggen. Sist kjem leggane, buken og innsida av låra.

Ikkje utstyrt med sveittekjetlar

Reinsdyret sveittar ikkje sjølv ved høge temperaturar og høg fysisk aktivitet. Reinen er altså ikkje utstyrt med sveittekjetlar for å regulere temperaturen. Dyra må difor på varme dagar kvitte seg med varme ved varmeleiing og luftsirkulasjon frå kroppen og beina. Også tunga blir brukt for å kvitte seg med varme. Reinen likar seg dårleg i varmt vêr, på varme sommardagar bevegar dyra seg difor opp i høgda, ofte så langt det er mogleg å koma. Viss reinen er i fysisk god stand, er det sjeldan regn, snø og kulde sjenerer han.

Sommarpelsen har færre ullhår enn vinterpelsen. Vidare utvikling av pelsen fortset utover til oktober då den tettare vinterpelsen er utvaksen. Av hjortedyra er det reinen som har flest både dekkhår og ullhår, deretter fylgjer elg og hjort med nokon lunde likt tal på hår.

Kjelder for denne artikkelen: Skjenneberg og Slagsvold: Reindriften og den grunnlag (1968) og Reimers: Våre hjortedyr (2018)

villrein.no – Kjell Bitustøyl

Kvifor og korleis ta CWD-prøver av villrein?

diverse

Det er laga to videoar i samband med CWD-prøvetakinga i haust. Den eine er om dugnaden i samband med årets villreinjakt og er laga av Miljødirektoratet, den andre er om sjølve prøvetakinga og er laga av Norsk Villreinsenter.

Villreinjakta på Hardangervidda er i år er skuva fram til 10. august på bakgrunn av funnet av ein CWD-smitta bukk i fjor. I samband med jakta på Hardangervidda, men òg i samband me den ordinære jakta i andre område, er det viktigare enn nokon gong å få inn CWD-prøver frå jegerane, både hjerneprøver og lymfeprøver. I den samanheng er det laga to korte videoar: Éin som handlar om kvifor det er så viktig at jegerar tek desse prøvene, og éin som viser konkret korleis ein tek lymfe- og hjerneprøver på best mogleg måte. Håpet frå ansvarlege styresmakter er sjølvsagt at så mange som mogleg vil ta del i denne dugnaden.

Link 1 – oppfordringa av Miljødirektoratet:

https://www.facebook.com/miljodirektoratet/videos/531371354778397

Link 2 – praktisk gjennomføring av CWD-prøvetaking:

https://www.facebook.com/norskvillreinsenter/videos/2896149740672580

villrein.no – Kjell Bitustøyl

Ny refusjonsordning for transport under villreinjakta på Hardangervidda

diverse

Som eit tiltak for å stimulere til meir effektiv jakt på Hardangervidda i haust, har Miljødirektoratet oppretta ei tilskotsordning for transport av reinslakt på Vidda.

Det er no mogleg å søkje om refusjon for utgifter i samband med transport med sjøfly eller helikopter i samband med jakta på Hardangervidda. Ein kan få refundert 80 % av kostnadane til utflyging av slakt, maksimalt 5000 kr pr. tur. Dette nye tilbodet, som gjeld i perioden 10. august til 10. oktober, omfattar både villrein, elg og hjort som er felt i Hardangervidda Villreinområde. Bakgrunnen for ordninga er at det er funne skrantesjuke på Hardangervidda og at ein ynskjer å auke uttaket av villrein, fyrst og fremst, men òg anna hjortevilt som elg og hjort.

For Nordfjella gjeld det ei anna ordning, der er det Statens naturoppsyn som administrerer utflyginga.

Les meir om ordninga på Hardangervidda og kva krav som blir stilt:

https://www.hjortevilt.no/tilskudd-til-helikoptertransport-pa-hardangervidda/

Om Nordfjella:

Inforskriv om utflyging av elg og hjort i Nordfjella

villrein.no – Kjell Bitustøyl

Planter med reinnamn

diverse

Reinsdyret har sett spor etter seg på så mange slags måtar, blant anna innafor botanikken. Reinrose og reinrosehei er velkjente omgrep i floraen vår, men kanskje er det ikkje så mange som veit at der finst fleire planter med namn etter rein. Kvifor dei har namn etter reinsdyret kan vera vanskeleg å finne ut, men einskilde har dette namnet av di reinen er ekstra glad i å beite på denne planta.

Reinrose

Den som har vore så heldig å støytt på teppe av reinsrose i den finaste bløminga, gjerne i eit område ein kallar reinrosehei, har hatt ei vakker oppleving. Reinrosa (Dryas octopetala) breier seg ofte utover store matter og er ein sterk indikator på gode vekstforhold i fjellet. Du finn den kvite blomen i lag med mange andre kravstore og næringsrike artar, t.d. fjellsmelle, mjeltartar, blå veronika og gule murer. På tørre snøfrie rabbar gjerne på laus skifer kan planta dominere, me kallar det reinrosehei. Reinrosa blømer rett etter snøsmeltinga og veks sakte, men planta kan bli svært gamal. Det latinske namnet dryas betyr eik, fordi reinrosdeblada liknar på eikeblad. Ein kallar gjerne reinrosa ei pionerplante, etter som ho var av dei fyrste plantene som innvandra til Noreg etter siste istid. Reinrosa gjeng høgt til fjells, 1850 moh i Jotunheimen.

Issoleie = reinblom

Issoleia (Ranuclus glacialis) er av dei mest hardføre plantene me har i den norske fjellheimen, på Galdhøpiggen er blomen funne så høgt som 2370 moh. Jegerar, reinsgjetarar og andre fjellfolk har merka seg denne planta og har visst at reinen gjerne bit av toppen av planta, reinen likar godt blomane. Og reinsgjetarar er blant dei som kallar planta for reinblom. Dette er elles eit namn issoleia har i mange område, blant andre Dovre, Vang og Rennebu. Andre variantar er reinsblomme (Lesja) og renssoløy, dette siste namnet er etter ein reinskyttar og fjellmann i Oppdal, Johannes Sivertsen Ishol.

Issoleia er saftfull, snau og har som oftast mange blomar. Blomane snur seg etter sola og konsentrerer varmen i midten av blomen. Du finn ofte planta i snøleie, fuktig grus og oppfrysingsmark.

Issoleie eller reinblom Foto: Kjell Bitustøyl

Setermjelt - ein nær slektning av reinmjelt, blomane er nokså like, men reinmjelten har spissere blad. Foto: Kjell Bitustøyl — Setermjelt – ein nær slektning av reinmjelt, blomane er nokså like, men reinmjelten har spissere blad. Foto: Kjell Bitustøyl

Andre planter med reinnamn

Me har vore innom dei to mest kjende plantene, men der finst endå fleire med rein i namnet. Reinmjelt (Oxytropis lapponia) er ei blomsterplante som liknar på ein meir vanleg blom – setermjelt, men planta er mindre og har meir spisse blad enn setermjelten. Også reinmjelten er å finne på kalkrik grunn, reinrosehei. Dei blåfiolette blomane er typiske for erteblomfamilien, med det ein kallar fane, venger og kjøl. Blomane sit saman i eit hovud. På Hardangervidda kan ein finne reinmjelten opp i 1550 moh.

Floraene opererer elles med to andre meir «anonyme» planter med reinnamn: Reinstorr (Carex arctogena) som er ein variant av hovudstorr. Denne storren veks på rabb og hei i fjellet, mest på baserik grunn, meir sjeldan i sørlegare fjellstrøk enn i Nord-Noreg. Planta er funne opp i 1720 moh i Jotunheimen. Ei anna plante er reinfrytle (Luzula wahlenbergli), dette er ei fjellplante som høyrer til i sivfamilien. Denne planta er å finne på fuktige stadar, snøleie, mest vanleg i Nord-Noreg.

Kjelder: Gjærevoll/Jørgensen: Fjellflora (1996), Lid og Lid: Norsk Flora (2017), Kristoffersen: Det blomstrende fjellet(2007) og Høeg: Planter og tradisjon (1975)

villrein.no – Kjell Bitustøyl

Kunsten å vera kalv

diverse

Simle og kalv frå Fram Reinlag, Jotunheimen. Foto: Kjell Bitustøyl

Få kjenner så godt til livet som villreinkalv i fjellheimen som reinsdyrforskar Olav Strand. Han har drive forsking på villrein i ein mannsalder og trivst ekstra godt ute i felt. Dette har han formidla på ulikt vis, blant anna i boka «Midt i flokken» (2015) og i eit eige kapittel i «Villreinen – fjellets nomade» ( 2016), «Kunsten å være villreinkalv». Skal ein lesa om reinkalvane frå dei er født til dei er vaksne, er det mykje å hente i det Strand har skrive. Det fylgjande er henta frå desse skriveria.

Historiene om reinskalvane handlar ofte om at dei født under tøffe forhold. Det kan vera kaldt og vinterleg i mai, og for ein nyfødt og blaut reinkalv handlar det om å bli fort tørr. Men genetikken er viktig, ei stor simle gjev ein stor og feit kalv. Varme dagar og feitt på kroppen er avgjerande for å få ein god start på livet. Undersøkingar viser at ei svak mor ikkje berre fører til ein liten kalv, men slike små kalvar greier ikkje å kompensere for ein dårleg start og blir små og relativt svake gjennom heile livet.

Villrein: Simler og kalvar. Det er tid for mjølk. Foto: Olav Strand

Ein nyfødt kalv har lange bein, altfor lange bein, likevel er dei kjapt oppe på beina, gjerne etter berre ein time etter fødselen. Så skal det til mjølk, feit reinmjølk, og så er det soving, gjerne i ein dunge saman med andre kalvar, men alltid i nærleiken av mor. Etter om lag fjorten dagar har kalven fått orden på beina, og kalvane oppdagar då gleda over å få orden på beina. Då er det tid for leik og fart på rabbane: «Kalven prøver å stoppe der, men tempoet er høyt, og fire bein går i kast. Det er ikke noe å si på farten, men bremseevna er ikke på topp ennnå.»

Reinsdyret er bygd for å røre seg, og det å flytte seg, vera i rørsle, er reinens beste forsvar mot fare. Det same gjeld for det å finne riktig og nok mat gjennom året. Etter nokre veker er rollene bytta om, no er det simla som må springe etter spreke, litt ustyrlege kalvar. Nokre dagar tidlegare var det simlene som måtte lokke og vente på kalvar som streva med å halde fylgje. Dette er ei viktig tid for kalvane, det handlar om kroppsleg utvikling, motorikk og det å lære å høyre til i ein flokk.

Sommarstid fører ofte varmen til at reinflokkane trykkjer seg saman på kjølande snøfenner om dagen på grunn av insektplaga. Men om kvelden når varmen har gjeve seg, trekkjer flokken ned mot dei beste beiteplassane, og då får kalvane høve til å strekke på beina og kanskje blir det kalvedans!

Utover sommaren byrjar kalvane etterkvart å supplere morsmjølka med anna føde, dei lærer seg å beite, men er det ei simle som er i god kondisjon, held dei fram med å die heilt fram til brunsten. Men kalvane skal òg lære å leva i flokk, for reinen er eit svært sosialt dyr, og det høyer med å lære seg eit vidt spekter med sosiale signal.

Reinkalv, tre-fire veker gamal, Vågå Tamreinlag. Foto: Kjell Bitustøyl

Til slutt ei historie frå Setesdal, ein situasjon Olav Strand og ein til var augnevitne til:

«De (ravnene) har funnet ei død simle. Hun ligger under et lite stup på mellom ti og femten meter. Det er slett ikke rare juvet mot de som ligger lenger ut i dalen, men likevel mer enn høyt nok . Hun har glidd oppe på kanten og tumla utfor. På toppen står kalven igjen. Han skriker på mora mens han saumfarer stupkanten. Etter noen minutter med iherdig lokking og leting gir han seg i vei oppover lia. Han finner andre reinsdyr, men søker videre når han oppdager at mora ikke er blant dem. Gang på gang kommer han ned til stupkanten igjen. Antagelig kjenner han lukten fra sine egne spor og følger dem.»

Men forfattaren trur kalven har små sjansar til å overleva, ein reinkalv er ikkje i stand til å klare seg åleine før han er ca. eit halvt år, så kanskje vil han bukke under i løpet av nokre få dagar. Naturen er brutal på denne måten, og fjellet og miljøet plukkar systematisk vekk dei svakaste dyra, slik blir reinen ein art som meistrar det arktiske landskapet, skriv Strand. Dei fylgjer kalven enno ei heil stund, og i det dei forlet området leitar kalven stadig etter mora – opp i lia og tilbake ned til stupkanten.

Gladsak for villreinen i Snøhetta og Nordfjella

diverse

Aursjødammen sett fra nordvest. Foto: Are Endal Rognes, Norsk villreinsenter — Aursjødammen sett fra nordvest. Foto: Are Endal Rognes, Norsk villreinsenter

Det ble i statsråd onsdag 23. juni fastsatt reviderte konsesjonsvilkår for Aurareguleringen og reguleringen av Hemsilvassdraget. Det skal opprettes et fond på 10 mill. kroner til undersøkelser og tiltak for villreinbestanden i Snøhetta og tilsvarende fond på 2 mill. kroner for undersøkelser og tiltak for villreinbestanden i Nordfjella.

Departementet skriver blant annet følgende i sin nyhetssak om Auravassdraget:

Auravassdraget ligger i Molde, Sunndal og Lesja kommuner og er regulert til kraftproduksjon. Hovedformålet med revisjonen er å bedre miljøtilstanden i vassdraget. Etableringen av Aursjømagasinet har medført at trekkrutene for villrein har blitt oversvømt og tilgangen til viktige beiteområder er redusert. Det er en klar sammenheng mellom vassdragsreguleringen og påvirkningen på villreinen i området. Det opprettes derfor et villreinfond på 10 mill. kroner som kan brukes på undersøkelser og tiltak av hensyn til villreinbestanden i Snøhetta. Fondet skal forvaltes i samarbeid mellom kommunene, NVE, miljømyndighetene og Statkraft.

I sin nyhetssak om Hemsilavassdraget skriver departementet blant annet følgende:

Hemsilvassdraget ligger i Hemsedal, Ål og Gol kommuner og er regulert til kraftproduksjon. Hovedformålet med revisjonen er å bedre miljøtilstanden. Etableringen av Gyrinos-Flævatn-magasinet har medført at trekkrutene for villrein har blitt oversvømt, og tilgangen til viktige beiteområder er redusert. Det er en klar sammenheng mellom vassdragsreguleringen og påvirkningen på villreinen i Nordfjella. Det opprettes derfor et villreinfond på 2 mill. kroner som kan brukes på undersøkelser og tiltak av hensyn til villreinbestanden. Fondet skal forvaltes i samarbeid mellom kommunene, NVE, miljømyndighetene og regulanten.

Nyhetssakene om disse revisjonene på regjeringen.no finner du her:

Reviderte konsesjonsvilkår i Auravassdraget – regjeringen.no

Reviderte konsesjonsvilkår i Hemsilvassdraget bedrer forholdene for fisk og villrein – regjeringen.no

Se kongelig resolusjon om revisjon av Auravassdraget her . Departementets vurdering av virkninger for villrein finner du på sidene 81-84.

Se kongelig resolusjon om revisjon av Hemsilavassdraget her. Departementets vurdering av virkninger for villrein finner du på sidene 69-71.

villrein.no kommer tilbake til saken når prosessen med etablering av fondene kommer i gang.

villrein.no – Raymond Sørensen

Ledig stilling innafor villreinforvaltning på Skinnarbu

diverse

Stillinga som sekretær for Villreinnemnda for Hardangerviddaområdet og Villreinnemnda for Brattefjell-Vindeggen, Blefjell og Norefjell-Reinsjøfjell er ledig, søknadsfrist er 1. august. Stillinga er på 100% og det er klima- og miljøvernavdelinga hjå Statsforvaltaren i Oslo og Viken som lyser ut stillinga, utlysinga skjer i samarbeid med Statsforvaltaren i Vestfold og Telemark som har ansvaret for Villreinnemnda i Brattefjell-Vindeggen, Blefjell og Norefjell-Reinsjøfjell.

Klima- og miljøvernavdelingane har ansvar for å fylgje opp at nasjonal klima- og miljøpolitikkblir blir sett ut i livet i fylka, ha oversikt over miljøtilstanden i fylket og bidra til at denne utviklar seg i ei klima- og miljøvenleg retning.

Den aktuelle stillinga er plassert i seksjon naturforvaltning – skog og fjell, og arbeidsstad er i utgangspunktet Norsk Villreinsenter Skinnarbu i Tinn kommune, eventuelt i kombinasjon med Statsforvaltarens kontor enten i Drammen eller i Tønsberg.

Villreinnemndene skal arbeide for ei langsiktig berekraftig forvaltning av villreinen og leveområda. Dei viktigaste arbeidsoppgåvene er å ha ansvaret for sekretariatsjobben for dei to villreinnemndene og sikre god kontakt med aktørar innan villrein- og arealforvaltning.

Heile utlysinga finn du her:

https://www.jobbnorge.no/ledige-stillinger/stilling/209023/lyst-til-aa-jobbe-med-villreinforvaltning-vi-ser-etter-en-raadgiver-seniorraadgiver-innen-naturforvaltning-som-kan-vaere-sekretaer-for-to-villreinnemnder

Eller her:

https://www.finn.no/job/fulltime/ad.html?finnkode=223722299

Ønskjer du nærare opplysningar om stillinga, ta kontakt med seksjonssjef Ellen Lien, tlf 22 00 36 62 / 984 05 669 eller seniorrådgjevar Even Knutsen tlf: 32 26 68 17

Søknad skal sendast via elektronisk søknadsskjema.

villrein.no – Kjell Bitustøyl

Hardangervidda: Ferdselsrapport med framlegg til tiltak

diverse

Frå turistløypa mellom Sandhaug og Tinnhølen Foto: Kjell Bitustøyl

Så er han her, NINA 1903 – den sterkt etterlengta ferdselsrapporten for Hardangervidda der framlegg til tiltak er med. Det er ein grundig rapport på rundt 100 sider. Seniorforskar Vegar Gundersen ved NINA er den som har hatt hovudansvaret for arbeidet med rapporten. Håpet er at rapporten skal kunne bidra til å betre villreinens levekår. Bakgrunnsdata for denne rapporten byggjer blant anna på GPS-merkeprosjektet på Hardangervidda tilbake til 2001, dette brukarfinansierte prosjektet har vore ein del av ferdselsprosjektet. Samtidig har det vore gjennomført svært mykje feltarbeid der ein har samla inn opplysningar om ferdsel av ulikt slag, både i randsonene og inne i kjerneområdet på Vidda.

Seniorforskar i NINA Vegar Gundersen Foto: Kjell Bitustøyl

Arbeidet med den endelege rapporten som no ligg føre, har teke tid og NINA-rapporten er den fjerde i rekkja som omhandlar ferdselsanalyser knytt villreinen på Hardangervidda. Datamengda har vore stor. Og naturleg nok har arbeidet bydd på utfordringar, særleg gjeld dette det heile rapporten munnar ut i: tilrådingar og tiltak. Her må rapporten sjåast i samanheng med andre prosessar som er i gang, til dømes regional plan. Når no rapporten med tilrådingar og tiltak er ferdig, vil likevel eit nytt verktøy for å kunne forvalte villreinstamma på Hardangervidda på ein god måte vera tilgjengeleg.

Mangla kunnskap

Kort oppsummert er bakgrunnen for denne rapporten at forvaltninga av den største villreinstamma i landet mangla tilstrekkeleg kunnskap om konsekvensane av den aukande menneskelege bruken av Vidda. På nasjonalt nivå har ein sett at turismen har blomstra opp som ei viktig næring i distrikta. Dette har ført til at ein både skal leggje til rette for å gje brukarane gode naturopplevingar samtidig som ein skal handtere den menneskelege bruken sett opp mot det som er eit akseptabelt nivå for å ta vare på villreinen og andre verneverdiar.

«Arealunnvikelse»

Resultata og analysane av det innsamla materialet viser at dagsturtrafikken er det som har auka mest (sjå oppslag om den førre rapporten), dette ikkje minst på grunn av den «tunge» utbygginga av infrastruktur i randsonene, til dømes hyttefelt med tilhøyrande vegar, merka stigar osv. Resultatet er at beiteområde har skrumpa inn og trekkmoglegheiter har blitt redusert. Denne utbygginga saman med tidlegare arealtap som vasskraftutbygging, vegar o.l. har «pressa» villreinen meir inn i kjerneområda. Analysane viser at det er den samla effekten av desse inngrepa i randsona som fører til det ein kallar «arealunnvikelse».

Villreinen i kjerneområda

Modellar er utarbeidd for å finne fram til dei beste leveområda for villreinen i dei sentrale delane av Hardangervidda. Dette er område som har ein infrastruktur med spreidde hytter og buer, turisthytter, både private og DNT-hytter, bruer, merka stigar og stikka løyper. Modellane viser at merka stigar og turisthytter er negative bidrag med tanke på kvaliteten på leveområda til villreinen i kjerneområda. Dette kjem fram i analysane av bruken av stigar i høve til reinsdyras evne til krysse desse stigane når trafikken blir for stor, ein stig med meir enn 25-30 personar per dag har vist seg å vera ein barriere slik at reinen ofte let vera å krysse.

Det hastar med å gjennomføre nokre store endringar

Rapporten gjev detaljert kunnskap om korleis forvaltninga kan jobbe vidare med å betre situasjonen for villreinbestanden: «Tiltakene må rette seg mot å begrense den menneskelige aktiviteten i de mest kritiske områdene. Rapporten gir forslag til endringer i infrastruktur av merka stier og turisthytter sentralt på vidda.» Det er særleg tilgangen til dei gode beita i vest dette handlar om. Ein har òg i eit framtidsperspektiv tatt høgde for at den menneskelege bruken av Vidda kan auke ytterlegare, og at ein difor må vera fleksibel i høve til både auka bruk og nye former for bruk. Konklusjonen er difor at det hastar med å gjennomføre nokre store endringar i infrastruktur for friluftsliv og turisme på Hardangervidda.

Å gje villreinen lettare tilgang til dei gode sommerbeita på Vest-Vidda er eit uttalt mål. Dette kan få konsekvensar for kvar stigane skal gå. Foto. Kjell Bitustøyl

Vintertrafikken

Når det gjeld trafikken vinterstid, kjem det fram at ein ikkje har greidd å påvise klare effektar av ferdsel vinterstid i dei sentrale delane av Vidda. Ein grunn til dette er at ein ikkje har nok data til å konkludere bastant. Men i randsonene er det annleis, her er påvist vesentleg påverknad på reinsdyras rørslemønster på grunn av maskinpreparerte løyper og folks bruk av områda i det ein kallar dagstursona. Tiltak kan difor dreie seg om å unngå at løypene går lenger inn i fjellet, omlegging av kvistaløyper som t.d. den mellom Litlos og Haukeliseter, kan vera eitt tiltak. Eit anna tiltak kan vera å føre eit strengt regime for stopp og parkering langs Rv7 og E134. Rapporten konkluderer òg med at ein bør vidareføre vinterstengde vegar som t.d. vegen over Imingfjell.

Sommartrafikken – størst negative konsekvensar

Det er likevel sommartrafikken som i denne rapporten blir trekt fram som det største trugsmålet mot villreinen, og at det difor er her det er mest å hente gjennom nye tiltak. Ein viser elles til at desse problemstillingane og tiltaka ikkje berre gjeld for Hardangervidda, men lett kan brukast i andre villreinområde.

Rapporten tek for seg område etter område og tilrådingane og tiltaka er mange. Det er her ikkje rom for å gå for detaljert til verks, men eit gjennomgåande tema er at ein må legge til rette for meir kanalisering av ferdsla, gjerne knytt til attraksjonar og rundturar i nærleiken av trafikkerte vegar og einskilde turisthytter ved veg. Fjerning av stigar kan vera aktuelt i dei tilfella desse kan opne opp for betring av villreintrekket.

Dei mest drastiske tiltaka i rapporten er knytt til dei sentrale DNT-hyttene og DNT-rutene på sentralvidda. Her er det framlegg om å vurdere både omplassering av hytter med eventuelle nybygg og omlegging av stigar. Ein anna tiltak kan vera å styre trafikken gjennom strengare bruk av opningstider. Men også i område meir i utkantane av Vidda kan det bli aktuelt med tiltak, omlegging eller nedlegging av stigar, stenging av vegar mm. Eit tiltak er òg å overvåke trafikken på utvalde merka stigar med faste teljarar.

Ein av dei sentrale turiststigane rapporten forslår å begrense trafikken på er stigen mellom Sandhaug og Litlos. Foto: Kjell Bitustøyl

Andre tiltak

I høve til motorisert ferdsel kjem òg rapporten med einskilde tiltak, som å avgrense dispensasjonar og ha strengare krav om dokumentasjon gjennom lokalisasjondata frå mobiltelefon. Og i høve til jakt er det ynskjeleg at friviljuge jaktsoner med forbod mot jakt blir vidareført. Når det gjeld byggjeaktivitet, ynskjer ein òg å avgrense denne, dette utifrå at oppgradering ofte fører til meir bruk og med det ein auke i den samla belastninga i området. Den uorganiserte ferdsla med telting, padling, bruk av el-sykkel o.l. byr på ei utfordring. Her kjem ikkje rapporten med konkrete tiltak, men drøftar ulike senario, og forbod/restriksjonar blir trekt fram som det einaste verkemiddlet som gjev effekt. Men her støyter ein fort i mot den etablerte allemannsretten i Noreg.

DNT kan måtta leggje om på innarbeidde turstigar. Foto: Kjell Bitustøyl

Oppsummering

I oppsummeringa legg ein i rapporten vekt på at for å få eit berekraftig og langsiktig vern av Noregs største villreinbestand, er dei viktigaste verkemidla eller tiltaka knytt til å avgrense ferdsel i villreinens kjerneområde sommarstid. Landskapet må restaurerast ved å fjerne og omplassere infrastruktur i konfliktområda for villrein: «Rapporten har identifisert tiltakene med størst positiv effekt på villreinbestanden til å omfatte merka stier og turisthytter i fem viktige trekkpassasjer i områdene rundt Litlos, Mogen, Mårbu, Lågaros og Hellevassbu. Rapporten peker på at det må radikale endringer og begrensninger i tilgang til merka stier og turisthytter i disse fem områdene.»

Sjå heile rapporten her.

villrein.no – Kjell Bitustøyl

Kvalitetsnormen – statusrapport Hardangervidda

diverse

Eitt av fokusområda på Hardangervidda er Haukeliseter-Hellevassbu-Litlos. Dette er frå området mellom Haukeliseter og Hellevassbu, til høgre litt opp for vassdraget ligg Simletind, grensenut mellom Vinje og Ullensvang. Vassdraget me ser er Bora innover dalen retning Hellevassbu. Foto: Kjell Bitustøyl

Arbeidet med kvalitetsnorm for villrein, med delnorm 3, er no godt i gang. I denne artikkelen skal det handle mest om Hardangervidda, eitt av dei 10 nasjonale villreinområda som skal klassifiserast fyrst. Delnorm 3 handlar om villreinens leveområde og menneskeleg påverknad. Bakgrunn for dette kvalitetsnormarbeidet finn du her: www.villrein.no/aktuelt/kvalitetsnormen-hva-gjor-vi?rq=kvalitetsnor

Norsk Villreinsenter har fått i oppdrag å skaffe fram og levere kunnskap om leveområda og den menneskelege påverknaden på villreinen i dei 10 nasjonale villreinområda me har. I villreinområda er peika på ulike fokusområde, det vil seie område som er spesielt utsett for nettopp påverknad frå menneskeleg åtferd og aktivitet. Desse saman med reinens ulike funksjonsområde gjennom året (sommar- og haustbeite, vinterbeite, kalvings- og oppvekstområde, samt viktige trekkpassasjar) skal kartfestast og skildrast ut frå grad av påverknad og med det reinens bruk eller eventuelt redusert bruk.

Dette arbeidet er i godt gjenge og viktigaste aktiviteten så langt har vore å gjennomføre møte for arbeidsgrupper der lokale ressurspersonar får koma fram med viktig kunnskap. Formidlinga av dette arbeidet går via eigne kartforteljingar. Kvart område får si eiga kartforteljing, denne forteljinga har med kva avgrensingar ein lyt ha med tanke på problemstillingar. Konkret handlar kartforteljinga mest om kva område/areal reinen vik unna, eller unngår å trekke gjennom, men òg kva denne «unnvikelsen» fører til av påverknad på andre område, område som i varierande grad har blitt mindre tilgjengeleg for reinen delar av eller heile året. Alt dette som ein konsekvens av menneskeleg påverknad i form av infrastruktur, ferdsel osv.

I sjølve karta som er digitale, kan ein klikke og zoome seg inn for å sjå nærare på detaljane. Fargane raud, gul og grøn er symbol som signaliserer stoda i kvart avgrensa mindre område i høve til i kor stor grad reinsdyra vik unna eller unngår dette området, sjølvsagt variabelt i høve til kva årstid det er snakk om.

Kunnskapen som kjem fram frå dei ulike arbeidsgruppene skal i neste omgang leggjast fram for ei ekspertgruppe som skal gjera den endelege klassifiseringa for kvart villreinområde. Planen er at dette arbeidet skal setjast i gang hausten 2021.

Hardangervidda

Arbeidsgruppene rundt Hardangervidda fordelar seg på desse fokusområda:

1. Rv7 og områda mellom RV7 og Bergensbanen.

2. Haukelifjell/Haukeliseter-Hellevassbu-Litlos

3. Imingfjell, Stegaros og Graveide

4. Tinnhølen og Hjølmoberget

5. Trolltunga

6. Songa, Falkeriset og Bitdalsområdet

7. Husedalen og Dronningstien

8. Nordvest-vidda og Mogen-Gjuvsjåen-Lågaros.

Viktigaste arbeidet ein no driv på med er å finpusse kartgrunnlaget, og så skal det gjevast ytterlegare skildringar av kvart einskild fokusområde i kartforteljingane. Stikkord her er å få med sommar- og haustbeite, kalvingsområde og område for oppvekst, samt vinterbeite og sentrale trekkpassasjar.

Norsk Villreinsenter tek gjerne i mot innspel slik at kartgrunnlaget skal bli så godt som mogleg. Dette gjeld både dei som alt har delteke i gruppemøta og andre som kan ha innspel. Alt vil bli lagt inn i kunnskapsgrunnlaget som ekspertgruppa skal bruke i klassifiseringa. NVS vil takke for bidraga så langt og ber om at innspel knytt til Hardangervidda blir sendt til lena.romtveit@villrein.no, helst innan utgangen av juli 2021.

villrein.no – Kjell Bitustøyl