No startar arbeidet med å få villreinen tilbake i Nordfjella

Foto: Karina Gjerde, Norsk villreinsenter

Publisert: 22.06.26 // Oppdatert: 24.06.26 // Tekst: Regjeringen

Arbeidet med å få tilbake villrein i Nordfjella startar i sommar.

Det er eit stort ønske og engasjement lokalt for å få villreinen tilbake til Nordfjella. Eg er glad for at me no set i gang arbeidet med å få dette til på ein trygg og god måte. Det er ei stor og krevjande oppgåve, men målet er å få villrein frå Nordfjella sone 2 over til sone 1 allereie til vinteren.
Andreas Bjelland Eriksen
Klima- og miljøminister

Skrantesjuke

Vinteren 2017/2018 vart heile villreinbestanden i Nordfjella sone 1 avliva etter at det året før vart påvist skrantesjuke. Sone 1 omfattar området nord/nordaust for fylkesveg 50 Hol-Aurland. Reetableringa skal skje med villrein frå Nordfjella sone 2, som er sør/sørvest for fylkesvegen.

Eg er glad for at me no kjem vidare med å reetablere villrein i Nordfjella sone 1. Det har vore viktig å leggje stor vekt på dei lokale ønska og fleirtalet i arbeidsgruppa i avgjerda om reetablering.
Nils Kristen Sandtrøen
Landbruks- og matminister

Skrantesjuke (CWD) er den mest alvorlege og smittsame sjukdommen som er påvist hos hjortedyr i Norge.

Gjerde og overvaking

Målet har heile tida vore å få villreinen tilbake. I april leverte ei arbeidsgruppe ein plan til Klima- og miljødepartementet og Landbruks- og matdepartementet. Myndigheitene skal basere arbeidet på råda til arbeidsgruppa.

Tiltaka som no vert igangsette er mellom anna:

  • Dialog om sperregjerde med grunneigarar.
  • Forsterke gjerdet langs riksveg 52 for å halde villrein og tamrein frå kvarandre
  • Fjerne sperregjerdet mellom sone 1 og 2 for å få dyr over frå sone 2 til sone 1. Deretter skal det setjast opp eit nytt gjerde for å halde villreinflokkane frå kvarandre fram til sone 1 er friskmeld.
  • Følgje opp sikring av salteplassar.
  • Sørgje for overvaking og kontroll med meir teljing av villrein, GPS-merking og testing, og betydeleg innsats i felt.

Det er Miljødirektoratet, i samarbeid med Mattilsynet og Landbruksdirektoratet, som koordinerer arbeidet.

Fakta

Reetableringa er delt inn i fire fasar:
Fase 1 – Arbeid før villrein vert overført frå sone 2 til sone 1
Fase 2 – Overføring av villrein frå sone 2 til sone 1
Fase 3 – Etablering av den nye bestanden i sone 1 og vandringshinder mellom sonene
Fase 4 – Gjenoppbygging av bestanden og overvaking

Overføringa av villrein skal verte gjennomført med aktiv driving av villreinflokken(ar) frå sone 2 til sone 1, etter prinsipp beskrivne i råda til arbeidsgruppa.

Departementa vil oppnemne ei prosjektgruppe med kompetanse på villrein, reindrift, forvalting, dyrehelse, dyrevelferd og smitteberedskap. Det skal vere ei balansert samansetjing med brei lokal deltaking i prosjektgruppa.

Les meir

Nyheitsaka på regjeringa si nettside
No startar arbeidet med å få villreinen tilbake i Nordfjella

Informasjonsnettside om reetableringsarbeidet
reetablering.no

Utkast til reetableringsplan
Plan for reetablering av villrein i Nordfjella